Извештај од патување: танго над облаците, или како Ангела Воробјева постави Гинисов рекорд на 86 години

Русинка од Улан Уде, на 86 години, постави нов Гинисов рекорд во високопланински трекинг: таа стана најстарата личност во светот што стигнала до врвот на Килиманџаро (5.895 м). Нејзината екипа стигна до врвот на 29 октомври 2015 година во 13:08 часот, UTC+3.

Altezza Travel прва ја слушна нејзината приказна за тоа како е да се биде на „покривот на Африка“ и како се продолжува низ поројните монсунски дождови. Еве што сподели со нас.

- Ангела, Ви честитаме за постигнувањето! Драго ни е што бевме дел од Вашиот успех. Колку што знаеме, ова беше Вашето прво високопланинско трекинг патување. Што Ви беше најтешко?

- Првите денови од нашата експедиција речиси личеа на мирна прошетка. Потоа почнаа силните дождови. Мислев дека никогаш нема да престанат. Дење пешачевме, а ноќе водичите ја сушеа облеката за наутро да имам нешто топло за облекување. Заморот ми изгледаше несовладлив; до денот за врвот, кој започна во Barafu Camp (4.600 метри надморска височина), бев сосема исцрпена. Тогаш почна најтешкиот дел од моето патување: освојувањето на врвот Ухуру, за кое ни беа потребни 13 напорни часа.

- Вашите параметри на циркулацијата на крвта на 4.600 м беа неверојатни: концентрацијата на кислород беше 89%, пулсот 70. Тоа значи дека високопланинската аклиматизација не Ви претставувала голем проблем.

- Пулсот и нивото на кислород навистина ми беа одлични. Секојдневните медицински прегледи го потврдуваа тоа. Сепак, бев исцрпена до крај.

- Ви помина ли некогаш низ глава да се вратите назад?

- Не, јас никогаш не се откажувам. Со водичот дури и танцувавме танго на 4.000 м. На 5.000 м имавме среќа да го видиме изгрејсонцето над облаците. Беше спектакуларно! Што друго... Речиси го изгубив гласот и едвај можев да изговорам збор, но враќањето назад ми беше последно на ум.

- Колку време поминавте на врвот? Што почувствувавте таму, на врвот на африканскиот континент?

- На врвот Ухуру поминавме речиси 1 час. Неговата убавина ме опчини. Не сакав да си заминам од тоа место. И не беше само поради глетките. Датумот за освојување на Килиманџаро, 29 октомври, не беше избран случајно. Знаев дека во тоа време од годината има дождови, но за мене беше многу важно да стигнам до врвот токму на тој ден. Пред 80 години ѝ ветив на мојата сестра Лидија дека ќе патувам за двете. Мојата сакана сестра беше 6 години постара од мене, родена во 1923 година. Почина од воспаление на белите дробови кога имаше само 12 години и 4 дена. Многу ја сакав. На денот кога стигнав до врвот беше нејзиниот роденден. Ова искачување ѝ го посветувам нејзе.

- Кога тргнавте на Вашето прво патување, Гинисовата книга на рекорди сè уште не постоеше. Сега кога Вашето име стана дел од неа, како се чувствувате?

- Немав идеја дека можам да станам рекордерка додека организаторите на мојата експедиција не ми го кажаа тоа во септември (се смее). Па, би излажала ако кажам дека не ми годи идејата да бидам спомната во Гинисовата книга.

- Како решивте да ја посетите Африка и да го искачите Килиманџаро?

- Ги сакам планините. Отсекогаш ме привлекувале. Ја сакам и Африка, особено нејзината природа. Освен тоа, Килиманџаро е највисоката самостојна планина во светот, но не е толку тешка како Елбрус или Еверест. Врвот не е покриен со мраз, па не бара посебни алпинистички вештини или опрема. Затоа решив да се обидам.

- Така доаѓаме до Вашата подготовка. Сигурен сум дека луѓето би сакале да знаат како се подготвувавте за ова искачување.

- Првично сакав да ја поминам Инка патеката во Перу, од Куско до Мачу Пикчу. Тоа е трекинг од 48 км на 4.000 м надморска височина. Мислев дека ако успеам да го совладам тој предизвик, следниот чекор ќе биде Килиманџаро. За жал, плановите за Перу пропаднаа и решивме да одиме директно во Танзанија. Многу пешачам и ретко имам проблеми со крвниот притисок. Секое утро го започнувам со вежбање и студен туш. Веројатно тоа беше целата моја подготовка.

- Дали сум во право ако помислам дека Инка патеката и Мачу Пикчу ќе бидат следното поглавје во Вашата книга на патувања?

- Секако! Покрај тоа, отсекогаш сум сонувала за крстарење Анадир-Мурманск, со посета на руските арктички острови и Северниот Пол. Патувањето не е само најдобар начин да се запознае светот; тоа помага и да се открие сопствената внатрешна сила, да разберете за што навистина сте способни.

Придружничка на Ангела за време на нејзината експедиција на Килиманџаро беше нејзината ќерка Вера (62 години). Почнаа да ја планираат експедицијата во февруари 2015 година. Нивниот успех зависеше од многу нешта: општата физичка состојба на двете жени, нивната издржливост и професионалната организација. Екипата за искачување на Ангела ја сочинуваа 14 професионални планинари. Нивната усогласена и стручна работа го направи ова искачување безбедно и успешно. Главните водичи на експедицијата, г. Елиас Масаве и г. Шабани Свалехе, имаат повеќе од 15 години искуство во искачување на Килиманџаро.

„Да се стигне до врвот Ухуру по секоја цена никогаш не беше наш прв приоритет“, коментира Александар Андрејчук, директорот на Altezza Travel. „Најважно беше искачувањето да биде безбедно. Сите наши експедиции вклучуваат сличен сет безбедносни мерки: секојдневни медицински прегледи, системи со кислород, висококалорична исхрана и друго. Сепак, ја приспособивме рутата и безбедносните мерки за Ангела и нејзината ќерка. Патем, на жената што го освои африканскиот врв не ѝ беа потребни ниту медицински комплети, ниту системи со кислород“. 

Посветена патничка, Ангела посетила многу земји од поранешниот СССР. Сепак, на првото меѓународно патување тргнала непосредно пред својот 80-ти роденден. „Впечатливо сафари во Боцвана, прекрасните Викториини Водопади во Замбија, привлечниот Кејптаун. Едвај можам да поверувам дека ги видов сите тие чуда! Се сеќавам на ’ртот Добра Надеж. Седев на карпа, а прскањето од огромните бранови се мешаше со солзите на моите образи...“ Така Ангела ја опишува својата прва средба со Африка.

Импозантниот Килиманџаро стана следниот трофеј во колекцијата на Ангела, а нејзините патувања ни оддалеку не завршуваат тука. Следни дестинации ѝ се Јужна Америка и Северниот Пол. Одбројувањето започна. На оваа несекојдневна и неуморна Русинка ѝ посакуваме сè најдобро на сите идни патувања. Во меѓувреме, Ангела и Вера ги чека заслужен одмор на сончевите плажи на Занзибар, како и сафари во Танзанија низ живописната танзаниска савана.

Актуелниот рекорд можете да го видите на оваа врска: Најстара жена што го искачила Килиманџаро

Сакате да дознаете повеќе за патувања во Танзанија?

Стапете во контакт со нашиот тим. Ги познаваме најважните дестинации низ Танзанија, а нашите советници за патувања со база кај Килиманџаро се подготвени да споделат практични совети и да Ви помогнат да го испланирате Вашето патување.

Повеќе интересни статии